എന്താണ് പോളിയോ..? അറിയാം ലോക പോളിയോ ദിനാചരണത്തെക്കുറിച്ച്...👇
ഇന്ന് ലോക പോളിയോ ദിനം. പോളിയോ രോഗത്തില്‍ നിന്ന് ഓരോ കുട്ടിയേയും സംരക്ഷിക്കുന്നതിനും വാക്‌സിനേഷന്റെ പ്രാധാന്യത്തെക്കുറിച്ച് അവബോധം വളര്‍ത്തുന്നതിനും, പോളിയോ നിര്‍മാര്‍ജനം സാധ്യമാക്കുന്ന പ്രൊഫഷണലുകളെയും സന്നദ്ധപ്രവര്‍ത്തകരെയും ആദരിക്കുന്നതിനുമാണ് എല്ലാ വര്‍ഷവും ഒക്ടോബര്‍ 24ന് ലോക പോളിയോ ദിനം ആചരിക്കുന്നത്.
പുരാതന കാലം മുതല്‍ മനുഷ്യനെ ഭയപ്പെടുത്തിയിരുന്ന രോഗമായിരുന്നു പോളിയോ.വെറസ് ബാധ മൂലമുണ്ടാകുന്ന സാംക്രമിക രോഗമാണ് ഇത്. മുഖ്യമായും കൂട്ടികളാണ് പോളിയോ വൈറസിന് ഇരയായിരുന്നതെങ്കിലും മുതിര്‍ന്നവരേയും ഈ മാരകരോഗം വെറുതെ വിട്ടില്ല. വളരെ അപൂര്‍വമാണെങ്കിലും, ശ്വസിക്കാന്‍ സഹായിക്കുന്ന തലച്ചോറിന്റെ ഭാഗങ്ങളെ വരെ ഈ വൈറസ് ആക്രമിക്കും, ഇത് മരണത്തിലേക്ക് നയിച്ചേക്കാം. ചലനശേഷി നഷ്ടപ്പെടുന്നതുള്‍പ്പടെ നിരവധി അപകടങ്ങള്‍ വേറെ.
1953 ല്‍ അമേരിക്കന്‍ ശാസ്ത്രജ്ഞന്‍ ജോനാസ് സാല്‍ക്ക് പോളിയോയ്ക്ക് എതിരെ വാക്‌സിന്‍ കണ്ടെത്തിയതോട് നൂറ്റാണ്ടുകള്‍ മനുഷ്യനെ ഭയപ്പെടുത്തിയ മഹാമാരിയ്ക്ക് പ്രതിവിധിയായി. വാക്‌സിന്റെ സുരക്ഷിതത്വം ഉറപ്പാക്കാനായി സ്വന്തം ശരീരത്തിലും ഭാര്യയിലും മക്കളിലും ആദ്യം പരീക്ഷിച്ച സാല്‍ക്ക് വാക്‌സിന്റെ പേറ്റന്റ്് വേണ്ടെന്ന് പറഞ്ഞു ശാസ്ത്രത്തിന്റെ മാനവിക മുഖമായി മാറി. ഏഴു ബില്ല്യണ്‍ ഡോളറോളം വരുമാനം ലഭിക്കുമായിരുന്നയിടത്തായിരുന്നു ഇത്.
1987ല്‍ ലോകാരോഗ്യ സംഘടനയുടെ കണക്കുപ്രകാരം ലോകത്ത് ഏറ്റവും കൂടുതല്‍ പോളിയോ രോഗികള്‍ ഉണ്ടായിരുന്നത് ഇന്ത്യയിലായിരുന്നു.1988ല്‍ പോളിയോ നിര്‍മ്മാര്‍ജനത്തിനായി ലോകാരോഗ്യ സംഘടന ആഗോള പദ്ധതി പ്രഖ്യാപിച്ചു. പോളിയോ യജ്ഞത്തിലൂടെ മുന്നോട്ട് പോയ ഇന്ത്യയെ ഇരുപത്തിയഞ്ചു വര്‍ഷങ്ങള്‍ക്കു ശേഷം 2013ല്‍ ഡബ്ല്യുഎച്ച്ഒ സമ്പൂര്‍ണ പോളിയോ വിമുക്ത രാജ്യമായി പ്രഖ്യാപിച്ചു. ‘ലോക പോളിയോ ദിനം 2023, അതിനുമപ്പുറം: അമ്മമാര്‍ക്കും കുട്ടികള്‍ക്കും ആരോഗ്യകരമായ ഭാവി’ എന്നതാണ് ഈ വര്‍ഷത്തെ പ്രമേയം.
എന്താണ് പോളിയോ..? അറിയാം ലോക പോളിയോ ദിനാചരണത്തെക്കുറിച്ച്...
ചികിത്സയില്ലാത്ത ഒരു പകർച്ചവ്യാധിയാണ് പോളിയോ. പക്ഷേ സുരക്ഷിതവും ഫലപ്രദവുമായ വാക്സിനുകൾ ഉണ്ട്. പ്രതിരോധ കുത്തിവയ്പ്പിലൂടെ തന്നെ പോളിയോ തടയാം. എല്ലാ വർഷവും ഒക്ടോബർ 24ന് ലോക പോളിയോ ദിനമായി ആചരിക്കുന്നു. പോളിയോ വാക്സിനേഷനും പോളിയോ നിർമാർജനത്തിനും വേണ്ടിയുള്ള അവബോധം വളർത്തുന്നതിനായാണ് ഈ ദിനാചരണം.
പോളിയോമൈലിറ്റിസിനെതിരായ വാക്സിൻ വികസിപ്പിച്ച ജോനാസ് സാൽക്കിന്റെ ഓർമക്കായാണ് ലോക പോളിയോ ദിനം ആചരിക്കാൻ തീരുമാനമായത്. 2026-ഓടെ പോളിയോ രഹിത ലോകം കൈവരിക്കുക എന്ന ആശയത്തോടെ 115ലധികം രാജ്യങ്ങളിൽ നിന്നുള്ള പ്രതിനിധികളുടെ യോഗം കഴിഞ്ഞ വർഷം ചേരുകയും വൈറസ് നിർമാർജനത്തിന് ആവശ്യമായ നടപടികൾ കൈകൊള്ളുകയും ചെയ്തിരുന്നു.
2014 മുതൽ പോളിയോ വിമുക്ത രാജ്യമാണ് ഇന്ത്യ. ഈ രോഗത്തിനെതിരെ രാജ്യം നേടിയ വിജയത്തിന്റെ സ്മരണക്കായി എല്ലാ വർഷവും മാർച്ച് 16 ദേശീയ വാക്സിൻ ദിനമായി ആചരിക്കുന്നുണ്ട്. ഒന്നിലധികം തവണ പോളിയോ വാക്സിൻ നൽകുന്നതിലൂടെ ഒരു കുട്ടിയുടെ ആരോഗ്യസ്ഥിതി മെച്ചപ്പെടുന്നുവെന്നാണ് കണക്കുകൾ പറയുന്നത്. ഓരോ കുട്ടിക്കും പ്രതിരോധ കുത്തിവയ്പ്പ് നൽകുന്നതിലൂടെ പോളിയോ നിർമ്മാർജ്ജനം ഉറപ്പാക്കുകയാണെന്നും ആരോഗ്യ വിദഗ്ധർ പറയുന്നു.
ഇന്ത്യയിൽ പോളിയോ തുള്ളിമരുന്നിന്റെ ആദ്യ ഡോസ് വിതരണം ചെയ്തത് 1995 മാർച്ച് 16നായിരുന്നു. പൾസ് പോളിയോ പദ്ധതിയുടെ ഭാഗമായി നവജാത ശിശുക്കൾ മുതൽ അഞ്ച് വയസ് വരെയുള്ള കുട്ടികൾക്ക് രണ്ട് തുള്ളി പോളിയോ വാക്സിനാണ് നൽകുന്നത്. ക്രമേണ ഈ പദ്ധതി വൻ വിജയമാവുകയായിരുന്നു. 2011 ജനുവരി 13ന് രണ്ടു വയസ്സുകാരിയിലായിരുന്നു ഇന്ത്യയിൽ അവസാനമായി പോളിയോ സ്ഥിരീകരിച്ചത്. 1988-ൽ വേൾഡ് ഹെൽത്ത് അസംബ്ലിയുടെ നേതൃത്വത്തിലാണ് ലോകമെമ്പാടും പോളിയോ നിർമാർജനത്തിനായി ക്യമ്പയിനുകൾ ആരംഭിച്ചത്. ലോകാരോഗ്യ സംഘടന (WHO), യുണിസെഫ് (UNICEF), യുഎസ് സെന്റർ ഫോർ ഡിസീസ് കൺട്രോൾ ആൻഡ് പ്രിവൻഷൻ, റോട്ടറി ഇന്റർനാഷണൽ, ബിൽ ആൻഡ് മെലിൻഡ ഗേറ്റ്സ് ഫൗണ്ടേഷൻ, ഗവി വാക്സിൻ അലയൻസ് തുടങ്ങിയ ഫൗണ്ടേഷനുകളും വിവിധ രാജ്യങ്ങളിലെ സർക്കാരുകളും ഈ മഹത്തായ ശ്രമത്തിൽ പങ്കാളികളായിരുന്നു.
ഭക്ഷണത്തിലൂടെയും വെള്ളത്തിലൂടെയും ശരീരത്തിലെത്തുന്ന വൈറസ്, കേന്ദ്ര നാഡീവ്യൂഹത്തേയും തലച്ചോറിനേയും ബാധിക്കുന്നതോടെ പക്ഷാഘാതത്തിലേക്കും ആജീവനാന്ത പ്രത്യാഘാതങ്ങളിലേക്കും നയിക്കും. പോളിയോ വൈറസ് ബാധിച്ച വ്യക്തികളുടെ മലത്തിൽ നിന്ന് അണുബാധ പകരാം. കൂടാതെ, പോളിയോ വൈറസ് ബാധിച്ച വ്യക്തിയുമായി നേരിട്ട് സമ്പർക്കം പുലർത്തുന്നത് പോളിയോമൈലിറ്റിസിന് കാരണമാകും.
പാളിയോ തടയാൻ പ്രധാനമായും രണ്ട് തരം വാക്സിനുകളാണ് ഉപയോഗിക്കുന്നത്. ഇനാക്ടിവേറ്റഡ് പോളിയോ വാക്സിൻ (IPV), ഓറൽ പോളിയോ വൈറസ് വാക്സിൻ (OPV). രോഗിയുടെ പ്രായത്തിനനുസരിച്ച് കാലിലോ കൈയിലോ ആണ് ഇനാക്ടിവേറ്റഡ് പോളിയോ വാക്സിൻ നൽകുന്നത്. 2000 മുതൽ അമേരിക്കയിൽ IPV മാത്രമേ ഉപയോഗിക്കുന്നുള്ളൂ. എന്നാൽ ഓറൽ പോളിയോ വൈറസ് വാക്സിൻ ഇപ്പോഴും ലോകമെമ്പാടും ഉപയോഗിക്കുന്നു. ടൈപ്പ്-1 (WPV1), ടൈപ്പ്-2 (WPV2), ടൈപ്പ്-3 (WPV3) എന്നിങ്ങനെ മൂന്ന് തരത്തിലാണ് വൈൽഡ് പോളിയോ വൈറസ് കാണപ്പെടുന്നത്. 1999-ൽ WPV2 പൂർണമായും നിർമ്മാർജ്ജനം ചെയ്യപ്പെട്ടു.
2020-ലാണ് WPV3 തുടച്ചുനീക്കിയത്. 2022-ലെ റിപ്പോർട്ടുകൾ അനുസരിച്ച് പാകിസ്ഥാൻ, അഫ്ഗാനിസ്ഥാൻ എന്നി രാജ്യങ്ങളിൽ മാത്രമാണ് ടൈപ്പ്-1 കേസുകളുള്ളത്. കഴിഞ്ഞ വർഷം പാകിസ്ഥാനിൽ രണ്ട് കേസുകൾ റിപ്പോർട്ട് ചെയ്തപ്പോൾ അഫ്ഗാനിസ്ഥാനിൽ അഞ്ച് പുതിയ കേസുകളാണുള്ളത്.
1988 മുതൽ ലോകത്താകമാനം പോളിയോ രോഗബാധിതരുടെ എണ്ണത്തിൽ 99 ശതമാനം കുറവുണ്ടായെന്നാണ് ലോകാരോഗ്യ സംഘടനയുടെ റിപ്പോർട്ടുകൾ സൂചിപ്പിക്കുന്നത്. പോളിയോ വൈറസ് നിർമാർജനത്തിൽ വിജയം കൈവരിക്കാനായിട്ടുണ്ടെങ്കിലും വൈറസിനെതിരായ പ്രതിരോധം തുടരണമെന്നാണ് ലോകാരോഗ്യ സംഘടന വ്യക്തമാക്കുന്നത്.
