കൊച്ചി: ഐ.എസ്.എല്ലിൽ കൊച്ചിയിൽ തോൽവി അറിയാതെ കേരളാ ബ്ലാസ്റ്റേഴ്സിന്റെ തേരോട്ടം. ഒന്നിനെതിരെ രണ്ട് ഗോളുകൾക്കാണ് ബ്ലാസ്റ്റേഴ്സ് ഒഡീഷയെ തകർത്തത്. മത്സരത്തിന്റെ ആദ്യ പകുതിയിൽ ഒഡീഷ ലീഡ് ചെയ്തു. 15-ാം മിനിറ്റിൽ ബ്രസീലിയൻ താരം ഡീഗോ മൗറീഷ്യോയാണ് ആദ്യ ഗോളടിച്ചത്. ബ്ലാസ്റ്റേഴ്സിന്റെ രണ്ട് പ്രതിരോധ താരങ്ങൾക്കിടയിലൂടെ ഓടിക്കയറിയ ഡീഗോ മൗറീഷ്യോ ആദ്യ ഗോളടിച്ചു. ബ്രസീലിയൻ താരത്തെ തടയാൻ ശ്രമിച്ച ബ്ലാസ്റ്റേഴ്സ് കീപ്പർ സച്ചിന്റെ കൈയ്യിൽ നിന്നും പന്ത് വഴുതി വലയിലേക്കെത്തി.
19-ാം മിനിറ്റിൽ വീണ്ടും മുന്നിലെത്താനുള്ള അവസരം ഒഡീഷ എഫ്സി കളഞ്ഞുകുളിച്ചു. ഇസാക് റാൾട്ടെയെ വീഴ്ത്തിയതിന് ലഭിച്ച ഫ്രീക്വിക്ക് ഒഡീഷ ആദ്യം നശിപ്പിച്ചു. അഹമ്മദ് ജഹായുടെ കിക്ക് ക്രോസ്ബാറിൽ തട്ടി തിരികെ വന്നു. പക്ഷേ ബ്ലാസ്റ്റേഴ്സിന്റെ നവോച സിംഗ് പന്ത് കൈകൊണ്ട് തട്ടിമാറ്റാൻ ശ്രമിച്ചു. ഇതോടെ ഒഡീഷയ്ക്ക് അനുകൂലമായി പെനാൽറ്റി ലഭിച്ചു. പക്ഷേ ഇത്തവണ സച്ചിൻ സുരോഷ് രക്ഷകനായി. ഡിഗോ മൗറീഷ്യയുടെ പെനാൽറ്റിയും പിന്നാലെ ഇസാക് റാൾട്ടെയുടെ ഗോൾശ്രമവും ഡബിൾ സേവിലൂടെ സച്ചിൻ രക്ഷപെടുത്തി.
ആദ്യ പകുതിയുടെ ഇഞ്ചുറി ടൈമിൽ വീണ്ടും സച്ചിന്റെ കിടിലൻ സേവ് ഉണ്ടായി. ഡീഗോ മൗറീഷ്യയ്ക്ക് സച്ചിനെ മാത്രമാണ് മുന്നിൽകിട്ടിയത്. സച്ചിന്റെ സേവിന് പിന്നാലെ റഫറി ഓഫ്സൈഡ് ഫ്ലാഗും ഉയർത്തി. മത്സരത്തിൽ പിന്നിലായ ശേഷം സമനില ഗോൾ കണ്ടെത്താനുള്ള തുടർച്ചയായ ശ്രമങ്ങൾ ബ്ലാസ്റ്റേഴ്സിന്റെ ഭാഗത്ത് നിന്നുണ്ടായി. പക്ഷേ അഡ്രിയാൻ ലൂണയെയും സംഘത്തെയും ഒഡീഷ താരങ്ങൾ പ്രതിരോധിച്ചു. ആദ്യ പകുതിയിൽ ബോൾ പൊസഷനിൽ ഇരുടീമുകളും ഏകദേശം തുല്യത പാലിച്ചു.
രണ്ടാം പകുതിയുടെ തുടക്കം മുതല് സമയം നശിപ്പിക്കാനായിരുന്നു ഒഡീഷ തീരുമാനിച്ചത്. ഇതോടെ 57-ാം മിനിറ്റിൽ ദിമിത്രിയോസ് ഡയമന്റക്കോസിനെ പരിശീലകൻ ഇവാൻ വുകാമനോവിച്ച് കളത്തിലേക്ക് ഇറക്കി. 66-ാം മിനിറ്റിൽ ബ്ലാസ്റ്റേഴ്സ് ആരാധകർ കാത്തിരുന്ന നിമിഷമെത്തി. ദിമിത്രിയോസ് ഡയമന്റക്കോസ് സൂപ്പർ സബായി മാറി. ഡയമന്റക്കോസിന്റെ ഷോട്ട് ഒഡീഷ ഗോൾകീപ്പർ അമരീന്ദർ സിംഗിനെ മറികടന്ന് വലയിൽ കടന്നു. മത്സരം 1-1ന് സമനിലയായി.
84-ാം മിനിറ്റിൽ ബ്ലാസ്റ്റേഴ്സിന്റെ വിജയഗോൾ എത്തി. ക്യാപ്റ്റൻ അഡ്രിയാൻ ലൂണയാണ് കേരളത്തിനായി ഗോൾ നേടിയത്. ലൂണയുടെ വലംകാലിൽ നിന്നുയർന്ന ഷോട്ട് തടയാൻ ഓടിയെത്തിയ അമരന്ദീർ സിംഗിന് സാധിച്ചില്ല. ഇതോടെ ബ്ലാസ്റ്റേഴ്സ് 2-1ന് മുന്നിലെത്തി. അവസാന നിമിഷം ഒഡീഷ സമനിലയ്ക്ക് ശ്രമിച്ചെങ്കിലും കഴിഞ്ഞില്ല. ഇവാൻ വുകാമനോവിച്ച് തിരികെ വന്ന ആദ്യ മത്സരത്തിൽ മഞ്ഞപ്പടയ്ക്ക് ആവേശ ജയം.
