മദ്റസകൾക്ക് നാളെ അവധി.
കോഴിക്കോട്: സമസ്ത കേരള ജംഇയ്യത്തുൽ ഉലമ ആദർശ സമ്മേളനം നാളെ (ഞായറാഴ്ച്ച) വൈകീട്ട് അഞ്ചിന് കോഴിക്കോട് കടപ്പുറത്ത് നടക്കുമെന്ന് ഭാരവാഹികൾ വാർത്ത സമ്മേളനത്തിൽ അറിയിച്ചു. ഇസ്‍ലാമിന്റെ തനത് രൂപം പ്രചരിപ്പിക്കുകയും അതിനെതിരെ വരുന്ന നീക്കങ്ങളെ നിയമവിധേയമായും ഫലപ്രദമായും പ്രതിരോധിക്കുകയുമാണ് സമസ്തയുടെ പ്രധാന ലക്ഷ്യം.
ഇക്കാര്യത്തിൽ കൂടുതൽ ശ്രദ്ധയൂന്നി പ്രവർത്തിക്കേണ്ട സന്ദർഭമാണിത്. ഇത്തരം സാഹചര്യത്തിൽ സമസ്തയുടെ ആശയപ്രചാരണവും മതത്തിന്റെ പേരിൽ വികലവീക്ഷണം പ്രചരിപ്പിക്കുന്നവരുടെ തനിനിറം വിശദീകരിക്കുന്നതായിരിക്കും.
മതവിശ്വാസികൾക്കെതിരായ ലിബറൽ ആശയക്കാരുടെ നിക്ഷിപ്ത താൽപര്യങ്ങൾ പാഠ്യ പദ്ധതികളിലും കലോത്സവങ്ങളിലും ഒളിച്ചു കടത്തുന്നതും ഇസ്‍ലാമോഫോബിയ പ്രചാരണങ്ങളും സമ്മേളനത്തിൽ തുറന്നു കാണിക്കുമെന്നും നേതാക്കൾ അറിയിച്ചു.
വൈകീട്ട് മൂന്നിന് വരക്കൽ മഖാം സിയാറത്തോടെയാണ് പരിപാടികൾ ആരംഭിക്കുക. 4.30ന് കടപ്പുറം സമ്മേളന നഗരിയിൽ സ്വാഗതസംഘം ചെയർമാൻ മുഹമ്മദ് കോയ തങ്ങൾ ജമലുല്ലൈലി പതാക ഉയർത്തും. തുടർന്ന് പൊതുസമ്മേളനം സമസ്ത കേരള ഇസ്ലാം മത വിദ്യാഭ്യാസ ബോർഡ്‌ പ്രസിഡന്റ് പി.കെ. മൂസക്കുട്ടി ഹസ്രത്തിന്റെ പ്രാർഥനയോടെ ആരംഭിക്കും. സമസ്ത പ്രസിഡന്റ് മുഹമ്മദ് ജിഫ്രി മുത്തുക്കോയ തങ്ങൾ ഉദ്ഘാടനം ചെയ്യും. ജനറൽ സെക്രട്ടറി പ്രഫ. കെ ആലിക്കുട്ടി മുസ്ലിയാർ അധ്യക്ഷത വഹിക്കും. അബ്ബാസലി ശിഹാബ് തങ്ങൾ അനുഗ്രഹ പ്രഭാഷണവും എം.ടി അബ്ദുല്ല മുസ്ലിയാർ മുഖ്യപ്രഭാഷണവും നടത്തും.
വാർത്ത സമ്മേളനത്തിൽ മുഹമ്മദ് കോയ തങ്ങൾ ജമലുല്ലൈലി, കെ ഉമർ ഫൈസി, എ.വി അബ്ദുറഹ്മാൻ മുസ്ലിയാർ, എം.സി മായിൻ ഹാജി, കെ മോയിൻകുട്ടി മാസ്റ്റർ, കൊടക് അബ്ദുറഹ്മാൻ മുസ്ലിയാർ, നാസർ ഫൈസി കൂടത്തായി, റഷീദ് ഫൈസി വെള്ളായിക്കോട്, ഒ.പി അഷ്റഫ് എന്നിവർ പങ്കെടുത്തു.
സമസ്ത നമ്മെ വിളിക്കുന്നു കോഴിക്കോട്ടേക്ക്.
ആദർശ മഹാ സമ്മളനത്തിനു വേണ്ടി ചരിത്രപ്രസിദ്ധമായ കടപ്പുറത്ത് വേദിയൊരുങ്ങിക്കഴിഞ്ഞു. കാലത്തിന്റെ നിയോഗമേറ്റെടുത്ത് ഞായറാഴ്ച ജനസഹസ്രങ്ങൾ സമ്മേളന നഗരിയിലേക്ക് ഒഴുകിയെത്തും.
വരയ്ക്കൽ മുല്ലക്കോയ തങ്ങൾ മുതൽ അനേകമനേകം പണ്ഡിത മഹത്തുക്കളുടെ പരമ്പര. കടുകിട പിഴക്കാതെയുള്ള അവരുടെ നേതൃമഹിമയും ജീവിതവിശുദ്ധിയുമാണ് നമ്മുടെ മൂലധനം. നൂറ്റാണ്ടിന്റെ കരുത്തുള്ള ആ പാരമ്പര്യവും പ്രയാണവും അഭിമാനകരമാണ്.
സയ്യിദ് അബ്ദുറഹ്മാൻ ബാഫഖി തങ്ങളും പി.എം.എസ്.എ പൂക്കോയ തങ്ങളും കണ്ണിയത്തുസ്താദും ശംസുൽ ഉലമയും സയ്യിദ് മുഹമ്മദലി ശിഹാബ് തങ്ങളും സയ്യിദ് ഉമറലി തങ്ങളും സയ്യിദ് ഹൈദരലി തങ്ങളുമെല്ലാം നയിച്ച പാതയിലൂടെ ചുവടു പിഴക്കാതെ നമുക്ക് മുന്നേറാം.
മുൻകൂട്ടി ഏറ്റു പോയ വിദേശ യാത്രാ ഷെഡ്യൂളിൽ ആയതിനാൽ നാളത്തെ ( എട്ടാം തീയതിയിലെ ) സമ്മേളനത്തിൽ പങ്കെടുക്കാനാവാത്തതിൽ പ്രയാസമുണ്ട്.
സമസ്ത ആദർശ സമ്മേളനം വിജയിപ്പിക്കുക.
സയ്യിദ് സാദിഖലി ശിഹാബ് തങ്ങൾ
(പ്രസിഡന്റ്,
എസ്.വൈ.എസ് സംസ്ഥാന കമ്മിറ്റി.)
മദ്റസകൾക്ക് നാളെ അവധി.
കോഴിക്കോട്: സമസ്ത ആദർശ സമ്മേളനം നാളെ കോഴിക്കോട്ട് നടക്കുന്നതിനാൽ സമസ്ത കേരള ഇസ്ലാം മത വിദ്യാഭ്യാസ ബോർഡിനു കീഴിലുള്ള മദ്സകൾക്ക് നാളെ അവധി ആയിരിക്കുമെന്ന് ജനറൽ സെക്രട്ടറി എം.ടി അബ്ദുല്ല മുസ്ലിയാർ അറിയിച്ചു.
